Phuahtu: Upa Zasiama
Ka awmhar lunglen chang ni hianin
Ka thlir vel he lei ram hi;
Lungngaih chhumin tlang tin a bawm,
Ka thla riang lungngaiin a vai.
Aw, min hruai la dam lai,
Lungngaih chhumpui zing hnuaiah hian;
Min awmpui la, aw ka Lalpa,
Tah lai ka bang ang e.
Aw, ka lungkham arsi piah ram,
Angel var lung rual an lenna;
Kei khawhar riangvai ka tahna,
Lungngaih chhum pui zing hnuaiah hian.
Aw, ka thlarau, i lungngaihna
He lei hrehaawm hi chhuahsanin;
Thuro angin thlawkin leng la,
Engthawlna ram khawpuiah chuan.
'Tah chuan lungngaih tah leh buaina,
A awm, tawh lo'ng, Kanan ramah;
Aw, Chhandamtu, min hruai zel la,
Thihna lui ral ram mawiah chuan.
0 Comments