Khawkhawm Hla

Phuahtu: Suakliana

Key: F

Kan hun tawng zingah khawkhawm a pawi ber mai,

Zoram hmun tin khawatlang puan ang a chul zo ta;

Tlang tin ami hruai khawm nunau mipuite’n,

Chhunrawl an van riakmaw iang-in an vai e.

Kan chatuan Pa vangkhua ka ngai zual thin,

Lungduh lenrual an kimna khawpui thar nuam;

Min hmangaihtu Lal nunnem ka ngai zual thin.

Chhung kim tea aw lenrual lungduhte nen,

Zai kan vawrna Van lal run leh khawtlang a dai;

Thuva awmhar chun tawng lote’n an nghak e,

Zarva lenna ram dai aw an chang zo ta.

Ka dawn sei ngam lo kan ram lungngaihna hi,

Sappui lungfing Mingo Valin hnutiang min chhawn;

Kan ram riangvai boral tur tungding turin,

Rairah chhantu Chung Pathian ka ngai vawng vawng.

Kan sualna zawng zawng Lalpa, min ngaidam la,

Zion par mawi Thlarau Thianghlim, min hruai zel la;

I chatuan ram hmun mawi nuam ka thlen hma chuan,

I kut chakin min chelh la, mal min sawm rawh.