I Harh Ang U (Poem)

Phuahtu: Zirsangzela Hnamte

Zofa leng zawngte’n lo ngai teh u

Ka lunglai kham biahthu ka hril dawn e

Min dem lo u, lerual  te.

Duh luat leh thahem ngaih vang ni se,

Hmanah kan pi leh pu ten

Tudang reng an ngai nem le

Nungcha leng zawng nen lunglai muangte

An chenza thin ram hausakna

Khawpkham loh reng a awm ngai lo

Kawla ni chhuak chhiarin

Kawltu chawiin fangrawl an rut

Thawhrim, taimak, rinawmna nen

AN diau ngai lo zum leh hriam karah pawh

Chutin an thawhrim rah kan ram rohlu

Buh leh bal leh thlai tinreng tlanin

Chhuan chham reng an hlau ngai lo.

Thlirin han dawn chiang ve teh

Zoramin hma a sawn kan ti maw?

Kei zawng ka lung a awi thei lo

Hmatiang sawn inti zofa te hi

Taimakna leh rinawmna te

Chhelna leh huaisenna ten hnutiang min chhawn ta em ni le?

Han dawn ve teh eng doral nge lo hrang ta le?

Kan nghahfak chu ration buhfai maw ni ta,

Kan chhekin te chu  khawiah nge?

Punjab, Haryana ah te an hung maw?

Anni thawhchhuah ang thawkchhuak ve turin

Zofa te hian tha leh zung kan nei lo bik em ni?

Kan nundan zel hi dawn ve teh

Thatchhiat hi em ni changkanna?

Chun leh zua thawhrim par tlanin

Kan inhampuar ruihhlo tinreng nen.

Intodelh zawng a har awm e.

Zofate chawmhlawma kan awm tur hi

Pi leh pu te thla pawh a zahawm lo maw?

Hai ang thangin hawi vel ila

Kan zoram hian a hausakna hai chhuak turin

Hmangaihna nen rinawm takin min nghak reng asin.

I harh ang u zofa lengte

Kan ramin min au ve.

Ram leh hnam hmangaihna nen

Thahnemngaiin pheilai khai rual ila

Chung khuanu lengin kan zotlang ram nuam leh mawi hi

Mal a sawm ang a,

Tichuan Mizoram a intodelh ta kan ti ve dawn nia.

(He poem hi 26^th March, 1999-a AIR Aizawlin intodelh theme-a hmanga Spring Concert Vanapa Hall-a a buatsaih tuma, he concert-a sawi (recite) tur atana a phuah a ni a. Hemi zan hian hmeichhe naupang Daisy Zorammawi-in thiam takin a recite a ni.)