(F. Lalzuithanga)
An chaih e tlai-sial iang pungkhawmzingah,
Hmusit, diriam, tihel tinreng tuarin;
An kai e, chal-lawi iang vangkhaw daiah,
Vuakna hruihrual a tuar, Kros chu puin.
An kilhbet ta kilhna khenthir vuahin
A fu-ke leh a chawnban mawi laiah,
An khengbet ta saruak mualpho tuarin,
Fam chan thlenga Kalvari Ennawmah.
Thing lenbuang lerah ka Lal Rengpui chu,
An tar ta amw, sa hrang thlunglu iangin;
A en ngam lo ka Lal Reng sakhmel chu,
Thangvan kai lai turipui hrang pawhin.
A siatir e, Khuavel lirpui nghingin,
Rauthlain an tho leh MI Thianghlimte;
Chatuan Van Pialrala siang lawi turin,
Piallei thuahriat hnuaia zal tawh hnute.
A thler ta e, daidanna zar-puan chu,
Van leh hringmi kardantu a bo ta!
A kin ta e hringda sual man bat chu,
Sula phurtu Beram No chu a fam ta.
Chuti kauva lungngaih, tuarna na hi,
Nang leh kei vangin a lo tuar chhuak ta!
Heti ema Hmangaihna nasa hi,
Nang leh kei tan hlanin a lo awm ta!
Ka fak ning lawng Hmangaih vanga TUARTU!
Ka phatsan tawh lawng ka Lal CHHANDAMTU!
0 Comments