Fur khaw cheng

Key: G                        -Lalsangzuali Sailo

Khuangruahpui sur, van rial lo rum,

Ka thlir vel kawl a hnim ruai e;

Khuafur hawktui lo luang dul dul,

Hnawm tin khawmin mual tin hrut e.

Zaleng naunawn run in chhungah,

Tap tual mawiin tuahmei an kil;

Runlum nuthai hraileng awiin,

Zaten an bel kaina run nuam.

Chhimthlang virthli fur tui paiin,

A chhem leng vel siahthing hnah nem;

Lamtluang zauva’n hawktui luang nen,

Laitual len zawng a har mang e.

Furpui khawcheng ban zai rel lo,

Thalengi chen awmni khamtu;

Lanu sekrek khawih bang ngei lo,

Tahpuan khawn lai a rel ta e.

Awmlai vei laikhum bel tan zawng,

A sei, a har, tlia nilen chu;

Dawn tawi lunglen a bang si lo,

A tlei ve lo sumtual daiah.